كتب محمود علام علي حسابه في منصة الفيسيوك
فنزويلا شكلها كده خلاص هتتحول لأوكرانيا جديدة، بس المرة دي هتتورّط فيها أمريكا! وفين… على بعد كيلومترات من أرضها!
ترامب أعلن امبارح إن المجال الجوي فوق فنزويلا “اتقفل خلاص وممنوع الاقتراب”… وحاليًا الرئيس الأمريكي بيفاوض الرئيس الفنزويلي نيكولاس مادورو على صفقة خروج آمن لروسيا من غير دم…
بس واضح كده إن المفاوضات مش ماشية، وملامح الأزمة بتقرب من نقطة الانفجار… كل الإشارات دلوقتي بتقول إن في ضربات جوية أمريكية على أهداف جوه فنزويلا في الطريق… أو على الأقل محاولة انقلاب متكاملة ضد النظام… وكل ده ممكن يحصل خلال ساعات!
طب يا ترى إيه اللي بيحصل هناك في بحر الكاريبي؟ وإيه اللي وصل الأمور للّحظة الحرجة دي؟
تعالى مع بعض نرجّع الشريط لورا شوية، ونفهم القصة من أولها، وهتعرف إن اللي بيحصل دلوقتي أخطر بكتير من مجرد أزمة حدود أو حرب على تجار المخدرات… إحنا قدام معركة جيوسياسية كاملة ممكن تغيّر خريطة القوى العالمية خلال أسابيع… 
شوف يا سيدي… كنت حكيتلك في مقال سابق ان ترامب خلال الأسابيع اللي فاتت قرر إنه يستخدم القوة القصوى ضد فنزويلا، ونفذ أكبر عملية حشد عسكري في المنطقة دي من أيام أزمة الصواريخ الكوبية سنة 1962!
الحشد ده متكون من أضخم حاملة طائرات في العالم، اللي هي الـ USS Gerald R. Ford، ومعاها أسطول من المدمرات اللي شايلة صواريخ موجهة، ومقاتلات F-35 وغواصات حربية، بالإضافة لحوالي 15 ألف جندي وعسكري… والعدد ده كله مفيش أي مبرر ليه غير إن أمريكا بتجهز لعملية عسكرية واسعة النطاق، أو على الأقل بتخطط لفرض الإرادة بالقوة الغاشمة…
امبارح بقى حصل تصعيد كبير في الأحداث، لما ترامب أعلن على منصة Truth Social إن المجال الجوي فوق فنزويلا “مغلق بالكامل”، ووجه رسالة مباشرة لكل الطيارات المدنية والعسكرية إن المنطقة أصبحت “منطقة عمليات” أمريكية… والخطوة دي لو انت مش واخد بالك؛ هي بالضبط المرحلة الأولى اللي بتحصل قبل بدء أي عمليات عسكرية…
طيب ترامب بيعمل ده كله ليه وعامل عقله بعقل فنزويلا ليه؟!
الهدف المعلن اللي بيقوله ترامب وإدارته هو الحرب على المخدرات… وتحديدًا على منظمة “كارتل دي لوس سوليس” (كارتل الشموس)، اللي صنفتها الإدارة الأمريكية كـ منظمة إرهابية أجنبية، وقالت إن مادورو نفسه هو رئيسها!
بس الحقيقة بقى هي ان الخطوة دي بتدي ترامب غطاء قانوني وإذن شبه مطلق إنه ممكن يضرب أي هدف على الأرض جوه فنزويلا، بحجة “مكافحة الإرهاب”، ومن غير ما يرجع للكونغرس عشان يوافق على إعلان الحرب…
وكل ده ليه؟!
عشان فنزويلا بتمتلك أكبر احتياطي نفطي في العالم!
البلد الصغيرة دي عندها احتياطيات ضخمة تعتبر هي الأضخم على الكوكب كله من النفط والبترول، ده غير كميات ضخمة جدًا من الذهب والمعادن الاستراتيجية اللي بتدخل في صناعة التكنولوجيا…
مادورو مش لوحده اللي بيسيطر على الثروات دي، بل هو شريك استراتيجي قديم لروسيا والصين وإيران… الصين مثلًا بتشتري نفطه، وروسيا هي اللي بتدعمه بالسلاح وبتمدّه بالشريان اللي بيخليه يتنفس!
لكن في المقابل، أمريكا بقى عايزة تحط إيديها على الثروات دي، ومش عايزة تسيبها في يد نظام متحالف مع أعدائها… وده سبب اللي بيحصل دلوقتي ده كله…
الصين وروسيا وإيران بيحاولوا يعملوا محور جديد يطوق النفوذ الأمريكي ويحطله فخ كبير جوار حدوده مباشرة… بالضبط زي الفخ اللي نصبته أمريكا والناتو لروسيا في أوكرانيا… ومن مصلحة ال 3 دول إن أمريكا تتسحل مع فنزويلا، عشان روسيا تعرف تخلص مع أوكرانيا والصين تركز على تايوان، وإيران تشم نفسها شوية ف الشرق الأوسط…
بس ترامب طبعًا مش عبيط، ومش عايز يتسحل في حرب مع فنزويلا إلا بعد ما يخنقها على الآخر… ف عمل ايه بقى؟! قرر يخنق صادرات النفط بتاعتهم…
الحاجة اللي يمكن ناس كتير مش واخده بالها منها، هي إن النفط الفنزويلي تقيل جداً، وعلشان يتصدر ويتباع في السوق الدولي، لازم يتخفف بمادة خام إسمها “النافتا”…
أمريكا زمان قبل كل القصص اللي بتحصل دي، كانت هي المورد الرئيسي للمادة دي لفنزويلا، لكن لما الدنيا باظت بين البلدين، روسيا دخلت على الخط وبقت هي المنقذ لمادورو، وبدأت توردله هي المادة دي عشان يقدر يصدر النفط بتاعه ويدخل دولارات يدعم بيها نفسه ويقف ضد أمريكا…
بس من كام يوم فاتوا، تقرير لوكالة بلومبرغ ذكر إن المدمرة الأمريكية USS Stockdale اعترضت طريق ناقلة روسية إسمها Seahorse كانت رايحة تسلم شحنة “نافتا” حيوية لفنزويلا، وأجبرتها تلف وترجع تاني وتعود أدراجها!
وفي نفس الوقت، أوكرانيا المدعومة أمريكياً شنت هجمات غامضة بطائرات بحرية مسيرة على ناقلتين نفط روسيتين إسمهم Kairos و Virat في البحر الأسود، والناقلتين دول جزء من “أسطول الظل” الروسي اللي بينقل النفط بعيد عن رقابة الغرب!
واخد بالك أيه اللي بيحصل؟!
ترامب بيحاول يقطع امدادات النافتا عن فنزويلا عشان يخنقها اقتصادياً ويشل قدرتها على تصدير أي برميل نفط، وفي نفس الوقت بيزق أوكرانيا تضرب الأسطول الروسي عشان يضغط عليه يوقف صادراته لفنزويلا، وبالتالي البلد تنهار داخليًا لوحدها من غير ما يضطر يحارب!
وعشان كده ف مادورو دلوقتي بيحاول يلعب ورقة الاستغاثة العسكرية وبيطلب من روسيا والصين وإيران صواريخ ومعدات عشان يجهز لـ مقاومة مطولة ضد أي تدخل أمريكي، وبالفعل حشد قوات جيشه العسكرية وحتى شكل ميليشيات شعبية في كل أنحاء البلد للدفاع ضد الغزو الأمريكي المحتمل…
وبكده، روسيا والصين مش مطلوب منهم إنهم “ينتصروا” لمادورو، المطلوب منهم بس إنهم يدعموه بالقدر اللي يخلي فنزويلا تتحول لـ مستنقع أو “أوكرانيا جديدة” في أمريكا اللاتينية!
دعم محدود بصواريخ دفاع جوي (زي صواريخ Igla-S اللي مادورو أعلن إن فنزويلا عندها 5000 منها)، ودعم لوجستي من الصين، كفيل بإنه يحول أي تدخل أمريكي لـ “حرب عصابات طويلة” تستنزف أمريكا ماليًا وعسكريًا، وتشتت تركيزها عن الجبهة الأوروبية والآسيوية…
وهو ده بالضبط المشهد اللي احنا واقفين عنده دلوقتي…
حسب مصادر صحفية زي الواشنطن بوست والنيويورك تايمز، ففي مكالمة تليفونية سرية حصلت النهارده الصبح بين ترامب ومادورو… مادورو طلب في المكالمة دي “عفو شامل” لنفسه وعيلته وكبار مساعديه اللي عليهم عقوبات أمريكية، مقابل إنه يسلم السلطة… لكن الرد الأمريكي كان صريح وقاطع: “لأ!”
التقارير بتقول إن واشنطن عرضت على مادورو خيار واحد بس… إنه يهرب لروسيا أو أي دولة تانية بسلام، في محاولة لـ “منح النخبة المحيطة بيه مخرج”، وإنه لو ممشيش بإرادته، أمريكا “هتتجه إلى خيارات أخرى بما فيها استخدام القوة”…
ف يا ترى أيه اللي هيحصل خلال الساعات اللي جاية؟!
هل مادورو هيسمع الكلام ويهرب لروسيا، ولا هيفضل ثابت على موقفه وترامب هيبدأ يشن ضربات جوية ضد فنزويلا، والمنطقة كلها هتشتعل؟!
الله أعلم…
بإذن الله هفضل متابع معاك التطورات خلال الساعات القادمة وأول ما يكون في جديد هحكيلك… وفي النهاية هتلاقيني سايبلك المصادر كلها في الكومنتات كالعادة ولو وصلت لهنا متنساش تعمل شير للبوست عشان يوصل للكل ويعرفوا تطورات الجبهة في أمريكا اللاتينية وصلت لفين..
شكرًا.
